Chosen one!

ప్రభువు ఎవరిని తన ప్రజలనుగా ఏర్పరచుకొనును? ఆయన సమస్తమైన దుర్నీతినుండి మనలను విమోచించి, సత్‌క్రియలయందాసక్తిగల ప్రజలను తన కోసరము పవిత్రపరచుకొని తన సొత్తుగా చేసికొనుటకు తన్నుతానే మన కొరకు అర్పించుకొనెను (తీతుకు 2:14; మత్తయి 1:21). ఆవిధంగా, ఆయన వారిని తన ప్రజలనుగా విమోచించి, వారితో కలిసి నివసించుచు, వారిని బలపరచి, అత్యధికమైన ఆశీర్వాదములతో వారిని నడిపించును. ‘‘అయితే మీరు చీకటిలోనుండి ఆశ్చర్యకరమైన తన వెలుగులోనికి మిమ్మును పిలిచిన వాని గుణాతిశయములను ప్రచురము చేయు నిమిత్తము, ఏర్పరచబడిన వంశమును, రాజులైన యాజకసమూహమును, పరిశుద్ధ జనమును, దేవుని సొత్తయిన ప్రజలునై యున్నారు’’ (1 పేతురు 2:9). మనము దేవుని చేత ఏర్పరచబడిన ప్రజలము. పూర్వకాలమందు దేవుడు అబ్రాహామును మరియు అతని వంశమును ఏర్పరచుకొని వారిని ఆయన యొక్క ప్రత్యేకమైన ప్రజలనుగా విశేషపరచుకొనిన ప్రకారముగా నేడు, దేవుడు మనలను తన యొక్క ఏర్పరచబడిన వంశముగా ఎంపిక చేసుకొనెను. ఇశ్రాయేలుకు మరియు అబ్రాహాము ఇంటికి చెందిన ఆశీర్వాదములన్నియు మనకు కూడ చెందినవే.

దేవుని గూర్చి ఎరుగని ఒక కుటుంబ సభ్యులు ఒకరి తరువాత ఒకరుగా అనారోగ్యము పాలయ్యారు. వారు తమ వద్దనున్న డబ్బంతటిని వైద్య ఖర్చులకు ఉపయోగించినను, వారు స్వస్థతపొందుకోలేదు. కనుక, ఈ కుటుంబము సంతోషమును సమాధానమును కోల్పోయి, ఏమి చేయాలో తెలియక వేదన అనుభవించారు. ఆ పరిస్థితులలో, ఒక సహోదరి, వారిని ‘‘యేసు పిలుచుచున్నాడు’’ ప్రార్థన గోపురమునకు తీసుకొని వెళ్లింది. ప్రార్థన యోధులు చూపించిన ప్రేమయు మరియు చేసిన ప్రార్థన ద్వారా వారు చాలా ఆనందించారు. వారు యేసు ప్రేమను అర్థము చేసుకొని, కుటుంబముగా వారి జీవితములను దేవునికి సమర్పించుకొని, ఆయన యొక్క ఏర్పరచబడిన ప్రజలుగా మారారు. వారి అనారోగ్యము తొలగిపోయినది మరియు దేవుని ప్రేమ వారి కుటుంబమును ఏకము చేసి, వారిని దైవీక ఆనందముతో నింపినది.