Dr. Paul Dhinakaran
அன்பு சகோதரரே / சகோதரியே, "தேவனே தம்முடைய தயவுள்ள சித்தத்தின்படி விருப்பத்தையும் செய்கையையும் உங்களில் உண்டாக்குகிறவராயிருக்கிறார்" (பிலிப்பியர் 2:13) என்பதே இன்றைய வாக்குத்தத்தம். ஆம், இந்த வசனம் கூறுகிறபடி, அவருடைய நன்மையான திட்டத்திற்கேற்ப உங்களுக்குள் விருப்பம் உருவாகவும், அந்த நன்மையான நோக்கத்தை நிறைவேற்றும் வல்லமையை நீங்கள் பெற்றுக்கொள்ளவும் தக்கதாக தேவன் கிரியை செய்வார். ஆகவே, சந்தோஷமாயிருங்கள்! எல்லாமே தேவனுடைய ஆளுகைக்குள் இருக்கிறது.
ஆண்டவரால் எப்போது உங்களுக்குள் கிரியை செய்ய முடியும்? தேவன், உங்கள் வாழ்க்கையைக் குறித்து நன்மையான நோக்கம் கொண்டிருக்கிறார் என்பதை முதலாவது நீங்கள் உணர்ந்துகொள்ள வேண்டும். வாழ்க்கையில் சில காரியங்கள் தவறிப்போயிருக்கலாம். உங்களைச் சுற்றிலும் மோசமான காரியங்கள் நடந்துகொண்டிருக்கலாம்; நீங்களும்கூட அவமானத்தின் வழியாக கடந்துசெல்ல நேரிட்டிருக்கலாம். பலவற்றை இழந்திருக்கலாம். தேவன் இதை ஏன் அனுமதிக்கிறார் தெரியுமா? நீங்கள் வெறுமையாகும்படியே அனுமதிக்கிறார். உங்கள் பெலத்தின் மீது நீங்கள் கொண்டிருக்கும் அகன்று போகும். அப்படித்தான் உங்கள் வாழ்க்கையில் தேவன் கிரியை செய்ய தொடங்குகிறார். உங்களை தம்மால் நிரப்பும்படி, தேவன் முதலாவது உங்களை வெறுமையாக்குகிறார். அப்போது அவருடைய நல்ல நோக்கம் உங்கள் வாழ்க்கையிலும், உங்கள் வாழ்க்கை மூலமாகவும் நிறைவேறும். தேவனுடைய சித்தத்தை செய்கிறவர்கள் மட்டுமே என்றைக்கும் நிலைத்திருப்பார்கள். மனுஷனும் அவனுடைய திட்டங்களும் ஒருபோதும் நிலைத்திருக்காது. ஆகவே, தங்களுக்கு இஷ்டமானதை தங்கள் பெலத்தில் செய்கிறவர்கள் கொஞ்சகாலமே இருப்பார்கள். ஆனால், தேவனோ நித்தியமானவர்.
வேதாகமத்தில் ஆபேல் என்ற மனுஷனைக் குறித்து வாசிக்கிறோம். "அவன் மரித்தும் இன்னும் பேசுகிறான்" என்று அவனைக் குறித்து எழுதப்பட்டிருக்கிறது (எபிரெயர் 11:4). இயேசுவைக் குறித்த காரியமும் அப்படியே இருக்கிறது. இயேசுவும், தேவனாக தாம் கொண்டிருந்த அதிகாரம், பெலன், இரத்தம், சரீரத்திலிருந்த ஜலம், கீர்த்தி, ஆரோக்கியம், மகிமை, ஐசுவரியம் எல்லாவற்றையும் வெறுமையாக்க ஒப்புக்கொடுத்து, தம்மையே சிலுவையில் பலியாக அர்ப்பணித்தார். உங்கள் வெறுமையை, வெறுமையான வாழ்க்கையை புரிந்துகொள்ளும்படி, உங்களை வெறுமையாக்கும் நேரத்தில் உதவும்படியே இயேசு அவ்வாறு செய்தார். ஆனால், மரித்து மூன்றாம் நாளில், ஜீவ தண்ணீராகிய தமக்குச் சொந்தமான பரிசுத்த ஆவியானவரால் இயேசு மறுபடியும் ஜீவன் பெற்றார். இப்போது இயேசு நித்தியமாய் ஜீவிக்கிறார். என்னுடைய வாழ்க்கை குறித்தும், உங்களுடைய வாழ்க்கை குறித்தும் அவருக்கு ஒரு நோக்கம் இருக்கிறது. ஆகவே, உங்களை வெறுமையாக்கும்படி தேவன் சில சூழ்நிலைகளை அனுமதிக்கும்போது, இயேசு உதவி செய்ய வருவார். நீங்கள் அவரை நோக்கிக் கூப்பிடும்போது, தேவ ஆவியானவர் உங்களை மறுபடியுமாய் எழுப்புவார் (ரோமர் 8:11). அதன்பிறகு 'நீங்கள்' அல்ல; கிறிஸ்துவே உங்களுக்குள் ஜீவிப்பார். பலமும் அல்ல; பராக்கிரமமும் அல்ல; தேவனுடைய ஆவியே உங்களை வாழச் செய்யும். தேவன் உங்களில் கிரியை செய்ய ஆரம்பிக்கிறார். உங்கள் மாம்ச விருப்பத்தின்படி அல்ல; தேவனுடைய விருப்பத்தின்படியே காரியங்களை செய்யக்கூடிய வாஞ்சையை உங்களுக்குத் தருகிறார். செயல்படும் வல்லமையை, உங்களை நேசிக்கும் இயேசு கிறிஸ்துவின் மூலமாக ஜெயங்கொள்ளும் வல்லமையை தருகிறார். நீங்கள் முற்றும்ஜெயங்கொள்ளுகிறவர்களாகிறீர்கள். இதுவே, இயேசு கிறிஸ்து மூலமாக தேவன் உங்களுக்கென வைத்திருக்கிற நன்மையான நோக்கம் நிறைந்த வாழ்க்கையாகும்.
Prayer:
பரம தகப்பனே, இந்த அருமையான வாக்குத்தத்தத்திற்காக உம்மை ஸ்தோத்திரிக்கிறேன். என் வாழ்க்கைக்கென நீர் நன்மையான நோக்கத்தை வைத்திருக்கிறீர் என்று விசுவாசிக்கிறேன். நீர் என்னை வெறுமையாக்கும்படி ஜெபிப்பதற்காக உம்முடைய சிலுவை முன்னே வருகிறேன். என்னுடைய சுயம் நீங்கும்படி என்னை வெறுமையாக்கி, உம்முடைய பரிசுத்த ஆவியினால் என்னை நிரப்பும். விசுவாசத்தை துவக்கிறவரும் முடிக்கிறவருமான நீர், என்னில் கிரியை செய்ய ஆரம்பிக்கவேண்டும் என்று ஜெபிக்கிறேன். இனி நான் அல்ல; கிறிஸ்துவே என்னில் ஜீவிக்கிறார். என்னை உபத்திரவப்படுத்தும் எல்லா சூழ்நிலைகளிலிருந்தும் என்னை உயிர்த்தெழச் செய்யும். என்னுடைய வாழ்க்கையை குறித்து நீர் கொண்டிருக்கும் நன்மையான நோக்கம் இன்றிலிருந்து நிறைவேறுவதாக. என்னிலும் என் மூலமாகவும் உம்முடைய நாமம் மட்டுமே மகிமைப்படுவதாக. இயேசுவின் நாமத்தில் ஜெபிக்கிறேன், ஆமென்.
