Gift For Prayer Intercessor

இனி எங்களால் எதுவும் செய்யமுடியாது..."

- மருத்துவர் கைவிட்ட பின்னர் குழந்தை ஸ்ரீ நவநிதியின் நிலை என்ன ஆனது?

"ப்ளேட்லெட் எண்ணிக்கை 14,000 தான் இருக்கிறது. இனி எங்களால் எதுவும் செய்ய முடியாது. வேண்டுமானால் வேறு பெரிய மருத்துவமனைக்கு பிள்ளையை கொண்டுபோய் பாருங்கள்," மருத்துவர் கூறியபோது அதிர்ந்துபோனார்கள் ராஜேந்திரன் - மேகலாதேவி தம்பதியர்.

சேலம் அம்மாபேட்டையில் வசித்து வரும் ராஜேந்திரன் - மேகலாதேவி தம்பதியருக்கு ஸ்ரீ நவநிதி, மௌரிஸ் என்று இரண்டு குழந்தைகள்.

சந்தோஷமாக வாழ்ந்து கொண்டிருந்த குடும்பத்தை ஸ்ரீ நவநிதிக்கு வந்த டெங்கு காய்ச்சல் துயரத்துக்குள் தள்ளியது.

குழந்தைக்கு காய்ச்சல் வந்ததும் மருத்துவமனையில் காட்டினர். சாதாரண காய்ச்சலாக இருக்கும் என்று மருத்துவர் சிகிச்சையை ஆரம்பித்தார். ஆனால் மூன்று நாட்கள் கடந்து காய்ச்சல் குணமாகவில்லை.

மருத்துவ பரிசோதனையில் குழந்தை ஸ்ரீ நவநிதிக்கு வந்திருப்பது டெங்கு காய்ச்சல் என தெரிய வந்தது. இரத்தத்தில் ஒன்றரை லட்சம் இருக்கவேண்டிய இரத்த தட்டணுக்களின் (platelets)எண்ணிக்கை 40,000 ஆக குறைந்திருந்தது.

"காப்பாற்றிவிடலாம்... தைரியமாயிருங்கள்..." என்று மருத்துவமனையில் கூறி சிகிச்சை கொடுத்தனர். குழந்தை ஸ்ரீ நவநிதியின் இரத்த தட்டணுக்களின் எண்ணிக்கை கூடுவதும் குறைவதுமாக இருந்தது. ஒரு கட்டத்தில் 30,000 ஆக குறைந்தது. இந்த நிலையில்கூட நம்பிக்கை இருக்கிறது என்று கூறினார் மருத்துவர்.

மறுநாள் இரத்த தட்டணுக்கள் 14,000 ஆக குறைந்துபோனதும், குழந்தையின் நிலை கவலைக்கிடமானது. குழந்தையின் உடல் வீங்கிவிட்டது. சிறுநீர் பிரியவில்லை. அதைப் பார்த்த குழந்தையின் பெற்றோர் ராஜேந்திரனும் மேகலாதேவியும் செய்வதறியாது திகைத்தனர்.

"குழந்தையின் உடல்நிலை கவலைக்கிடமாக உள்ளது. எங்களால் இதற்கு மேல் எதுவும் செய்ய இயலாது. வேறு பெரிய மருத்துவமனைக்கு வேண்டுமானால் கொண்டு செல்லுங்கள்," என்று மருத்துவர் கூறினார்.

மருத்துவமனையில் குழந்தை இருந்த அறையிலேயே உடைந்துபோய் உட்கார்ந்திருந்தனர் பெற்றோர். அந்த நேரம் குழந்தை ஸ்ரீ நவநிதியின் தாய் மேகலாதேவிக்கு 'இயேசு அழைக்கிறார்' ஜெப கோபுரம் நினைவுக்கு வந்தது.

குழந்தை படுத்திருந்த அறையிலிருந்தே 'இயேசு அழைக்கிறார்' ஜெப கோபுரத்திற்கு தொலைபேசி மூலம் தொடர்பு கொண்டார்கள்.

மறுமுனையில் பேசிய சகோதரியிடம் குழந்தையின் நிலையை கூறி, ஜெபிக்குமாறு கேட்டுக்கொண்டார்கள் மேகலாதேவி. அந்த ஜெப வீராங்கனை, விசுவாசத்துடன் ஊக்கமாக குழந்தை ஸ்ரீ நவநிதிக்கு ஆண்டவர் சுகத்தை அருளவேண்டுமென ஜெபித்தார்கள்.

அதுவரை கண் திறக்காமல் துவண்டுபோய் படுத்திருந்த ஸ்ரீ நவநிதி, ஜெபித்து முடித்து சில நிமிடங்களுக்குள் கண்களைத் திறந்தாள். "அம்மா, யூரின் போகணும்," என்றாள்.

நடப்பதை தாய் மேகலாதேவிக்கு நம்ப இயலவில்லை. அதுவரை சிறுநீர் பிரியாமல் இருந்து வந்தநிலையில், குழந்தை சிறுநீர் கழிக்கவேண்டும் என்று கூறியது ஆச்சரியமாக இருந்தது.

சிறுநீர் கழித்தபிறகு ஸ்ரீ நவநிதியை பரிசோதித்த மருத்துவர், "இனி பயமில்லை" என்று கூறினார்.

சிகிச்சை முடிந்து, பூரண சுகம் பெற்று பள்ளிக்கும் செல்ல ஆரம்பித்துவிட்டாள் ஸ்ரீ நவநிதி.

குடும்பமாக சேலத்திலுள்ள 'இயேசு அழைக்கிறார்' ஜெப கோபுரத்திற்கு நேரில் சென்று சாட்சி கூறி ஆண்டவரை மகிமைப்படுத்தினார்கள் ராஜேந்திரன் - மேகலாதேவி தம்பதியர்.

நான்கு ஆண்டுகளுக்கு முன்பு ஆண்டவர் செய்த இந்த அற்புதத்தை இப்போதும் அவர்கள் நெகிழ்ச்சியோடு பகிர்ந்துகொள்கிறார்கள்.

குழந்தை ஸ்ரீ நவநிதி, புதுவாழ்வு பெற்றதுபோன்று, 'இயேசு அழைக்கிறார்' ஜெப கோபுரத்தில் ஜெப வீரர்கள் ஏறெடுக்கும் பிரார்த்தனையின் மூலம் அநேகர் புதுவாழ்வு பெற்று வருகின்றனர்.

"இதோ, நான் சகலத்தையும் புதிதாக்குகிறேன்" (வெளிப்படுத்தல் 21:5)

"வாழ்வில் எல்லாம் முடிந்துவிட்டது" என்று மனமுடைந்த மக்கள், 'இயேசு அழைக்கிறார்' ஜெப வீரர்களோடு இணைந்து ஜெப கோபுரத்தில் ஜெபிக்கும்போது ஆண்டவர் அவர்கள் வாழ்வில் அற்புதங்களைச் செய்து புதிய ஆசீர்வாதங்களை அருளுகிறார்.

கடன் பாரத்தால் அழுத்தப்பட்டு, நிம்மதியிழந்து தவிக்கும் மக்கள் ஜெப கோபுரத்திற்கு வந்து ஆண்டவரின் பாதத்தில் தங்கள் கவலைகளை வைத்து, ஜெப வீரர்களோடு இணைந்து ஜெபிக்கும்போது கர்த்தர் பரலோகத்திலிருந்து ஒத்தாசை அனுப்பி, கடன் பாரத்தை அகற்றுகிறார்.

பல்வேறு நெருக்கடிகளில் சிக்கித் தவிக்கும் மக்கள் விடுதலை நாடி ஆண்டவரண்டை வந்து, ஜெப கோபுரத்தில் ஜெபிக்கும்போது, கர்த்தருடைய ஆவியானவர் அவர்களை விடுவிக்கிறார்.

கவலையோடு வருபவர்களோடு இணைந்து ஆண்டவரிடம் மன்றாட ஆவியின் அபிஷேகமும், விசேஷித்த பயிற்சியும் பெற்ற ஜெப வீரர்கள் ஆயத்தமாக இருக்கிறார்கள்.

ஆண்டவரிடமிருந்து அற்புதங்களை பெற்றவர்கள் நன்றி காணிக்கையாய் கொடுக்கும் நன்கொடைகளைக் கொண்டே ஜெப வீரர்களுக்கும், ஜெப வீராங்கனைகளுக்கும் ஊதியம் வழங்கப்படுகிறது.

கடந்த ஆண்டில் ஆண்டவர் ஜெப வீரர்களின் ஜெபத்தை கேட்டு உங்கள் வாழ்வில் செய்த நன்மைகளை நினைவுகூர்ந்து, புத்தாண்டில் ஜெப வீரர்களுக்கு வெகுமதி அளித்திடுங்கள்.

இந்தியா முழுவதும் பல்வேறு மாநில மற்றும் மாவட்ட தலைநகரங்கள், சிறுபட்டணங்கள் என்று நூற்றுக்கும் மேற்பட்ட இடங்களில் இயேசு அழைக்கிறார் ஜெப கோபுரங்கள் இயங்கி வருகின்றன.

தினமும் காலை 8 முதல் இரவு 8 மணி நேரில் வருவோருக்கு இலவசமாக ஜெப சேவை அளிக்கப்படுகிறது.

இயேசு அழைக்கிறார் ஜெப கோபுரங்களில் வணிக ஆசீர்வாத கூட்டம், பெண்கள் ஆசீர்வாத கூட்டம், அபிஷேக கூட்டம், குடும்ப ஆசீர்வாத கூட்டம், வாலிபர் கூட்டம், சிறுவர் ஆசீர்வாத கூட்டம் உள்ளிட்ட பல்வேறு சிறப்புக் கூட்டங்கள் நடைபெறுகின்றன. அநேகர் அவற்றில் கலந்துகொண்டு ஆண்டவரின் அற்புத தொடுதலை உணர்கிறார்கள்.

கர்த்தரின் பாதத்தில் தனித்து தியானம் செய்ய தியான அறைகள் ஜெப கோபுரங்களில் உள்ளன. தியான அறையில் அமர்ந்து தாங்களாக ஜெபித்து, தெய்வீக சமாதானத்தையும், இளைப்பாறுதலையும் ஜனங்கள் பெற்றுக்கொள்கின்றனர்.

"வருஷத்தை உம்முடைய நன்மையால் முடிசூட்டுகிறீர்" (சங்கீதம் 65:11)

இயேசு அழைக்கிறார் ஜெப கோபுரத்திற்கு தொலைபேசி மூலம் தொடர்பு கொள்வோரின் அழைப்புகளை ஜெப வீரர்கள் ஏற்று ஜெபிக்கின்றனர். தமிழ், மலையாளம், தெலுங்கு, கன்னடம், ஹிந்தி, மராத்தி, குஜராத்தி மற்றும் ஆங்கிலம் ஆகிய எட்டு மொழிகளில் பிரார்த்தனை சேவை வழங்கப்படுகிறது.

வியாதி மற்றும் நோயிலிருந்து சுகம் பெறுவதற்கு, அடிமைத்தனங்களிலிருந்து விடுதலை பெறுவதற்கு, விபத்து நேரங்களில், பொருளாதார நெருக்கத்தின்போது, தேர்வு நேரத்தில், தம்பதியரிடையே கருத்துவேறுபாடு வரும்போது, குடும்ப உறவுகளில் பிரச்னை எழும்போது என்று எந்தச் சூழலில் ஜெப உதவி தேவைப்பட்டாலும் தொலைபேசி மூலம் ஜனங்கள் தொடர்பு கொண்டு ஜெப உதவி பெறுகின்றனர். ஆண்டவர் ஜெபத்தை கேட்டு, அற்புதங்களை, அதிசயங்களை மக்கள் வாழ்வில் நடப்பிக்கிறார்.